Job 10

1 “Senginengwa yimpilo yami; ngakho sengizasola ngingasathikazi ngithulule ubuhlungu bomphefumulo wami.

2 Ngizakuthi kuNkulunkulu: Ungangilahli, kodwa ngitshela ukuthi ungethesa cala bani.

3 Kuyakuthabisa na ukungizwisa ubuhlungu, ukulahla umsebenzi wezandla zakho, ikanti uyahlekelela ngamacebo ezigangi?

4 Ulamehlo enyama na? Ubona njengokubona kwabantu na?

5 Izinsuku zakho ziyafanana lezabantu yini, kumbe iminyaka yakho injengeyomuntu yini,

6 osungaze uphenye iziphambeko zami njalo ulandelele isono sami –

7 loba wena ukwazi ukuthi angilacala lokuthi kakho ongangikhulula esandleni sakho?

8 “Izandla zakho zangibumba zangenza. Pho usuzaphenduka ungibhidlize na?

9 Khumbula ukuthi wangibumba njengomdaka. Pho usuzabuye ungiphendule uthuli na?

10 Kawungithululanga yini njengochago njalo wangijiyisa njengolaza,

11 wangigqokisa ngesikhumba lenyama, wangithungela ndawonye ngamathambo lemisipha?

12 Wangipha ukuphila wangitshengisa umusa, ukunanza kwakho kwawelusa umoya wami.

13 “Kodwa lokhu yikho owakufihla enhliziyweni yakho, njalo ngiyazi ukuthi lokhu kwakukhona engqondweni yakho:

14 Aluba ngona, ngabe wawungikhangele wawungezukuyekela ukona kwami kungajeziswa.

15 Aluba ngilecala – maye mina! lokuba ngingelalo icala, akukho engingakwenza, ngokuba ngiyafa ngenhloni njalo ngiyagalula ekuhluphekeni kwami.

16 Nxa ngingathi ngivusa ikhanda ungicwathela njengesilwane uphinde utshengise amandla akho esabekayo kimi.

17 Uletha ofakazi abatsha abangilahlayo, wandise ulaka lwakho kimi; amabutho akho angihlasela amaviyo ngamaviyo.

18 “Pho kungani wangikhupha esizalweni na? Ngifisa ukuthi ngabe ngafa ngingakabonwa laloba yiliphi ilihlo.

19 Aluba ngivele ngingazange ngibe yilutho oluphilayo, loba ngathwalwa ngisuka esizalweni ngasiwa ethuneni!

20 Izinsuku zami ezilutshwana kaseziphela nje? Akungifulathele ukuze kengizuze umzuzwana wentokozo

21 ngingakayi lapho okungabuywa khona, elizweni lobumnyama lethunzi elikhulu,

22 elizweni lobusuku obujule okungale, elethunzi elinzima lenhlikinhliki, lapho lokukhanya kunjengomnyama.”